Kvinnur gera færri íløgur enn menn

Kvinnur halda seg ikki framat í sama mun sum menn, tá tað snýr seg um at gera íløgur.

Hetta merkir millum annað, at fleiri kvinnur fara frá við eftirløn við eini lægri upphædd enn menninir.

Men hetta noyðist ikki at vera so, sigur Hjalti Mohr Jacobsen, íløguleiðari í Føroya Banka.

Kvinnur minni váðafúsar

Sambært Hjalta Mohr Jacobsen eru kvinnur sum heild minni váðafúsar enn menn, og hava ikki líka stóran áhuga fyri íløgum.

Men um hugt verður aftur í tíð, so hevur tað loyst seg ógvuliga væl at hava uppsparing og pensjón í íløgum, sambært íløguleiðaranum.

Tí er hetta ein vinningur, sum lutfalsliga fleiri menn enn kvinnur fáa ágóðan av.

Kvinnur eiga minni inni

Fíggjarliga gjógvin millum kynini er ikki nakað nýtt. Og hon gerst ikki minni, um kvinnur ikki halda seg framat at fáa part av vinninginum.

- Kvinnur hava eina lægri pensjón frammanundan, og um tær eisini fáa eina lægri úrtøku, so fer støðan ikki at broytast framyvir, sigur Hjalti Mohr Jacobsen.

Tað er í síðsta enda ein sjálvur, sum má taka stigið. Og spyrt tú íløguleiðarin er hetta eitt umráðandi stig at taka støðu til.

Trýst á pílin niðanfyri og hoyr innslagið, sum varð sent í tíðindunum seinnapartin.