LÍV kunnar eigararnar um støðuna

Eigararnir av Tryggingarfelagnum LÍV eru boðsendir á fund í høvuðssætinum seinnapartin, har teir verða kunnaðir um støðuna. 

Fleiri undrast á, at stjórin einsamallur verður offraður, sum tey málbera seg.

Fríggjadagin bórust tíðindini, at stjórin í Tryggingarfelagnum LÍV seinastu 14 árini, Jan Jakobsen, fer frá sum stjóri, og at felagið samstundis tekur seg úr fyritøkuni Globe Tracker, sum hevur kostað LÍV-samtakinum, og harvið føroysku tryggingartakarunum, 174 milliónir krónur.

Í dag klokkan hálvgun fimm skulu eigararnir av LÍV so hava at vita, hvat vendir upp, og hvat vendir niður í tí, sum alsamt meira líkist eini gølu.

Eigararnir eru P/F Fakfelag, sum telur 21 føroysk fakfeløg, og Ognarfelagið LÍV, sum tryggingartakararnir sjálvir eiga. 

Jan Jakobsen, LíV

Vita einki

Sum útvarpið hevur frætt, eru tað ikki bara nevndirnar í feløgunum báðum, sum eru kallað til kunnandi fund í høvuðssætinum hjá LÍV á Óðinshædd í Havn, men umboð fyri øll 21 feløgini í P/F Fakfelag og teir 35 limirnir í umboðsráðnum hjá Ognarfelagnum, sum eru beinleiðis valdir av tryggingartakarunum.

Nógvir bendir eisini á, at tað er uppá tíðina, at eigararnir verða kunnaðir, tí umboð úr bæði P/F Fakfelag og umboðsráðnum, sum útvarpið hevur tosað við, siga, at tey snøgt sagt onki vita um, hvat gongur fyri seg.

Tey seta sær eisini spurningin, um tað bara er stjórin, sum nú skal ofrast, tí tey halda, at hann neyvan hevur gjørt alt einsamallur og uttan okkurt slag av heimild frá nevndini í Tryggingarfelagnum LÍV.