Umboðsmaðurin gav átalu - umlættingartilboðið er framvegis ikki nóg gott

Javni finst at Almannaverkinum, sum ikki enn hevur veitt einum 13 ára gomlum dreingi við serligum tørvi eitt umlættingartilboð meinlíkt tí, drongurin hevði frammanundan, og sum hann hevur rætt til.

Drongurin er fluttur til Sands til umlættingar, hóast tað er lívsneyðugt fyri dreingin at vera nærri einum sjúkrahúsi.

- Hetta snýr seg um lív, sigur Helena F. Jørmundsson, forkvinna í Javna.

Helena F. Jørmundsson

Løgtingsins umboðsmaður gav í apríl Almannaverkinum eina álvarsliga átalu fyri júst hetta málið.

Almannaverkið skuldi tá alt fyri eitt veita barninum eitt tilboð, sum samsvarar við tilboðið, barnið hevði frammanundan. Men nú, tríggjar mánaðir seinni, er tað framvegis ikki gjørt.

Hoyr innslag í útvarpstíðindunum: 

Hjørdis S. Mortensen, Almannaverkið

Hjørdis S. Mortensen, stjóri í Almannaverkinum, vil ikki úttala seg til útvarpið, men sigur, at málið verður viðgjørt, og eingin avgerð er tikin enn.

Hon sigur, at Almannaverkið er í holt við at finna eina loysn saman við avvarðandi myndugleikum og foreldrum.

]]