ES: Føroyar áseta sær ov stóra kvotu av makreli og sild

Føroyar geva sær ov stórar kvotur av makreli og sild.

Tað heldur ES-ráðið, sum harmast stórliga um semjuna, Føroyar hava gjørt um makrel, uttan at øll standarlondini eru samd um býtið, og utttan at ES er við.

Hetta er ikki burðardygt, sigur ES-ráðið. Og her trýtur uppbyggjandi samstarv við ES, leggur ráðið aftrat. 

Skulu vera meiri uppbyggjandi

ES-ráðið leggur dent á, at Føroyar skulu vera meira uppbyggjandi í NEAFC fyri at tryggja burðardygd og býta fiskin rættvíst, sum sagt verður.

ES-ráðið hevur viðgjørt støðuna millum ES og tey lond í vesturevropa, sum ikki eru í ES. Teirra millum eru Føroyar.

Ráðið sigur, at seinastu árini er samstarvið millum ES og Føroyar um nógv øki styrkt.

Fegnast um tiløk móti Russlandi

ES-ráðið fegnast um, at Føroyar taka undir við tiltøkunum hjá ES móti Russlandi, men sigur einki um fiskiveiðusáttmálan millum Føroyar og Russland.

Tað fegnast eisini um, at Føroyar gera so nógv við varandi orku og berjast móti veðurlagsbroytingum.

Og tað fegnast um, at Føroyar vilja vera við í útbúgvingarskránni Erasmus.