Heimsmeistarin víðari eftir stórdrama í Atlanta

Lionel Messi hevði tár í eygunum, tá hann takkaði viðhaldsfólkunum í Atlanta.

Ikki tí Argentina skuldi heim, men tí heimsmeistarin skuldi víðari.

Men tað kundi tað sama verið farvæl, tí Egyptaland var á odda við tveimum, til bert 11 minuttir vóru eftir av vanligu leiktíðini. 

Mál, kolldøming og eitt misnýtt Messi-brotsspark

Yasser Ibrahim stútaði egyptar framum, tá eitt korter var spælt, men nakrar fáar minuttir seinni fekk Argentina brotsspark. Hóast Messi hevði misnýtt úr ellivu metrum fyrr í kappingini, skuldi hann aftur skjóta, men úrslitið var hitt sama.

Eftir steðgin helt Mostafa Zaki Abdelraouf, at hann hevði økt til 2-0 eftir framúr skjótálop fram ígjøgnum høgru síðu, men málið var kolldømt og gleðin tikin frá egyptum, tí VAR sá eitt fríspark ímóti egyptum í hinum endanum av vøllinum. Løtu seinni eydnaðist kortini hjá Abdelraouf at skora eftir enn eitt frálíkt egyptiskt kontra, og so var 2-0.

20260707-182046-l-3205x1660ma.jpg

Frítekst tagging: 

Ítróttur

Fótbóltur

HM í fótbólti

Egyptaland

HM 2026

HM í USA

Argentina vendi øllum

Norðurafrikanararnir tevjaðu nú fjórðingsfinaluna, meðan heimsmeistarin var á knøunum. La Albiceleste vildi kortini ikki geva skarvin yvir og fingu løn fyri stríðið.

Cristian Romero minkaði fyrst um munin við skallara, og í 83. minutti javnaði ein stálsettur Messi við frálíkum hálvfluktara. Áttanda málið hjá tíggjaranum í endaspælinum. 

Bæði liðini royndu at avgera dystin, og tá tveir minuttir vóru spældir av yvirtíðini, fekk Enzo Fernández høvdið á eitt innlegg, sum sendi argentinarar til himmals. Dreymurin teirra um enn eitt heimsmeistaraheiti var mestsum burtur, men livir nú aftur.