MVG kemur aftur á brennievni á midnátt

Frá á midnátt skal aftur rindast 25 prosent í meirvirðisgjaldi av bensini og diesel, sum annars hevur verið undantikið mvg seinastu tríggjar mánaðirnar. 

Tað merkir, at prísurin á brennievni hækkar við umleið trimum krónum fyri liturin.

Um prísirnir annars eru óbroyttir, soleiðis sum dagsprísurin er á olju í dag, so fer bensinið hjá EFFO úr 11,35 krónum upp í 14,19 krónur fyri liturin, meðan diesel hækkar úr 11,53 krónum upp í 14,41 krónur fyri liturin.

Hjá Magn fer bensinið úr 11,55 krónum upp í 14,44 krónur fyri liturin, meðan diesel hækkar úr 11,73 upp í 14,66 krónur fyri liturin.

MVG-frítøkan á bensini og diesel var ein fyribils skipan, sum altso nú fer úr gildi á midnátt.