140.000 fermetrar av náttúrulund

Edmund Joensen, gamli politikarin, hevur frá fyrsta degi verið eldsálin í Náttúrulundini við Streymin, sum er ein stór verkætlan, ið eitt sjálvsognarfelag við limum stendur fyri.

Edmund Joensen sigur, at verkætlanin hevur frá fyrsta degi fingið góða undirtøku. Gróðursetingin og annað er gjørt sjálvboðið. Annars hevur felagið fingið 15 milliónir kr. í stuðli frá danska náttúrugrunninum Aage V. Jensen. Fyri tað er høvuðsarbeiðið í lendinum gjørt.

- Eg eri stoltur, at eg ikki longur síggi upp um tey elstu trøini. Nú eru tey oman fyri tveir metrar, og tað gongur skjótt, sigur Edmund Joensen.

Felagið hevur keypt gamla garnavirkið á Oyrabakka, sum er í økinum, har náttúrulundin er sunnan fyri brúnna eysturoyarmegin. Arbeiðið at gera húsið klárt til undirvísing er nærum liðugt, og Skúlin við Streymin fer at hava ábyrgdina av húsinum. Ætlanin er, at skúlanæmingar kring alt landið skulu hava møguleika at koma hagar at fáa undirvísing um náttúruna og í náttúruni.

Edmund Joensen er fegin um, at fólk longu nú brúka lundina. Nógv ganga, og onnur renna í lundini fyri at fáa motión.

Annars kanst tú hoyra samrøðuna við Edmundi Joensen her: