Tríggjar átalur í sambandi við flyting

Tryggingareftirlitið hevur givið NordikLív tríggjar átalur og eini boð.

Hetta er í sambandi við samstarv um persónstryggingar millum Føroya banka og tryggingarfelagið LÍV. 

Á sumri í 2024 avgjørdi Føroya Banki at fara undir samstarv um persónstryggingar við LÍV. 

Frammanundan hevði bankin í nógv ár havt samstarv við NordikLív um persónstryggingar.

NordikLív hevði danska felagið Forenede Gruppeliv sum undirveitara. 

Endamálið við samstarvinum við LÍV var at bjóða kundum bankans eina einfaldari loysn við einum føroyskum veitara.

Og samstundis varðveita somu dygd, tænastu og kappingarføru prísir sum áður, skrivar Føroya banki.

Nýggja avtalan gjørdi, at allir kundar bankans, sum høvdu avtalu um persónstryggingar, skuldu flytast úr verandi avtalum við NordikLív, yvir í nýggjar avtalur hjá LÍV.

Ómakaleyst

Roynt varð at gera hesa flyting so smidliga og ómakaleysa fyri kundarnar sum gjørligt, skrivar Føroya banki.

Men í tilgongdini vórðu nøkur viðurskifti ikki heilt rætt handfarin.

Tryggingareftirlitið finst at kunningini, sum kundarnir fingu í sambandi við flytingina. 

NordikLív hevur tikið átalurnar til eftirtektar, skrivar Føroya banki.

Bankin skrivar, at eingin kundi hevur verið fyri missi, eingin hevur klagað ella mótmælt.

Allir kundar fáa komandi vikurnar kunningarskriv frá LÍV. 

Hoyr innslag í útvarpstíðindunum, har Malan Poulsen Bisp eisini hevur samrøðu við Gudmund Effersøe Nónstein, ráðgeva í Tryggingareftirlitinum, um málið: