Meistaradeildin: KÍ á FM-gáttuni við hattrikki frá Hummeland

Durita Hummeland helt fram við málskjótingini, tá KÍ vann 4-0 á Skála við Djúpumýru í dag.

Toppskjúttin hjá klaksvíkingum var hetjan á Tórsvølli fyri einari viku síðan, tá hon avgjørdi steypafinaluna ímóti HB við málið í yvirtíðini, og ímóti Skála helt hon málformin gott av væl við líka við hattrikki í seinna hálvleiki.

Málini komu afturat tí, sum Birita Mohr skoraði í fyrra hálvleiki.

HB var fyri stórum vónbroti í steypafinaluni, tá tær mistu 2-1 leiðsluna í teimum allarseinastu minuttunum, men um tað óvirkaði avrikið ímóti Víkingi í Gøtu skal verða ósagt.

Í hvussu er vann heimaliðið 3-0 við tveimum málum frá Jensu Tórálvsdóttir og einum frá Sáru Vang Justinussen.

Munurin millum liðini vaks upp í átta stig, nú bert tríggir dystir eru eftir at spæla í ovara endaspælinum, og tí er sannlíkt, at KÍ fer at tryggja sær meistaraheitið næsta vikuskiftið, tá tær aftur spæla ímóti Skála.