Fýrverksmálið í Vági eisini í rættinum í dag

Málið um tey átta tonsini av fýrverki, sum vóru funnin einum sethúsum í Vági í september 2024, er eisini fyri í rættinum í dag.

Sambært ákæruritinum er talan um átta tons og 233 kilo av fýrverki, sum høvdu ligið har í umleið trý ár. 

Ákærdi maðurin hevði ikki loyvi at goyma fýrverkið í sethúsunum. 

Hann er ákærdur eftir grein-252 í revsilógini. Hon sigur at "tann, sum við vinningi í huga, í grovum ovfarakæti ella á tílíkan fyrilitarleysan hátt elvir til nærliggjandi vanda fyri lívi ella likamsførleikum hjá øðrum persóni, verður revsaður við fongsli í upp til 8 ár."

Er enn í varðveitslu

Løgreglan legði beinanvegin hald á tey 8,2 tonsini av fýrverki, sum vórðu funnin í Vági. Fýrverkið er enn í varðveiðslu hjá løgregluni og ákæruvaldið krevur at tað verður burturbeint.

Ákæruvaldið krevur fongsulsrevsing, upplýsir Katrin Thorsvig Hansen, høvuðsákæri, sum tó ikki vil útgreina kravið nærri.

Maðurin noktar seg sekan í ákærunum.