Ein maður deyður á sjónum seinasta árið

Ein maður er deyður á sjónum hetta seinasta árið, síðani minningarhald teirra sjólátnu var í fjør.

Tað var Eyðfinn Rólant Johansen úr Miðvági, sum doyði 14. desember um borð á trolaranum Stelki.

Hann var 69 ára gamal. 

Minningarhald teirra sjólátnu verður sunnudagin, alla halgannadag.

Almenna minningarhaldið verður í Vinnuháskúlanum í Havn klokkan 14.

Sjómansmissiónin skipar fyri.

Løgmaður talar

Á minningarhaldinum talar løgmaður og Heri Joensen, prestur, hevur andakt. 

Síðani leggur løgmaður krans við minnisvarðan í Viðarlundini í Havn. 

Og gudstænasta verður í Dómkirkjuni klokkan 20.

Tey, sum verða nevnd á almenna minningarhaldinum, eru skrásett hjá Landsfólkayvirlitinum at búgva í Føroyum, og hava latið lív í yrki á sjónum, av sjúku ella vanlukku.

Nevnd við umboðnum fyri manningarfeløgini, Reiðarafelagið, Vørn, Mentamálaráðið, Løgmansskrivstovuna, Sjómansmissiónina og fólkakirkjuna ger av, hvør skal nevnast.