Solti mjólk stendur á grønu mjólkarpakkunum. Er tað rætt at siga solti mjólk, um mjólkin er 'hon'?

Verður tað skrivað í tveimum orðum, so skal tað sjálvandi vera 'soltin mjólk'. Mjólk er kvennkyn, hon er soltin. Vit kunnu ikki siga, at hon er soltið (við ð), sigur Elin Henriksen, málkøn, og vísir á, at á mjólkarpakkunum er ongin bindistrika, og tí er talan um tvey orð: solti mjólk. 

Soltin er lýsingarorð, bendist eins og vakin, ella løgin. Hann er løgin, hon er løgin, tað er løgið.

Og sama støða ger seg galdandi við lættimjólk.

Í Góðan morgun, Føroyar

Halda tey røðu ella røður, og eitur tað í Góðan morgun, Føroyar ella í Góðan morgun, Føroyum?

- Eg haldi, at tað snildasta hevði verið als ikki at fingið sær heiti, ið eru so torfør at benda, sigur Elin Henriksen.

Hon greiðir frá, at í hesum føri eru 'Føroyar' partur av heitinum og verður ikki bent: Vit hoyrdu í 'Góðan morgun, Føroyar', at ...

Hyggjuráðini frá Elini Henriksen eru tó, at tað besta er at seta eitt eyka orð inn: 'Vit hoyrdu í sendingini 'Góðan morgun, Føroyar', at ...

Heming og bygdanøvn

Hvat er tað at eta heming á seg? Og skulu bygdanøvn bendast, tá til dømis andlát verða lisin upp í útvarpinum?

Lurtari ger vart við, at onkuntíð eru staðarnøvnini bend, og onkuntíð ikki. Hví tað? Og hvat er rættari?

Elin Henriksen greiðir frá, at tað gamla er at benda bygda- og staðarnøvnini, soleiðis at man sigur Toftum heldur enn Toftir, Strondum heldur enn Strendur og Vági heldur enn Vágur.