Nú eru næstan 1.000 fólk smittað. Seinastu næstan tvey árini hava hesi orðini verið dagligur partur av tíðindaflutninginum, men hvussu er við lýsingarháttinum í fleirtali - fær hann i í endan ella ikki?

Eitur tað liðini eru mannaði ella mannað, brøvini eru skrivaði ella skrivað ella fólk eru smittaði ella smittað?

Mega og sodavatn

Orð sum kul, feitt og mega eru orð, eru orð, sum verða serstakliga nógv brúkt, meðan onnur orð við somu merking detta út úr málinum, tí tey ikki verða brúkt longur.

Mega er eitt orð, sum styrkir tað, sum tú sigur - júst sum ógvuliga, sera, óvanliga og so framvegis.

Um tú slært ógvuliga upp í samheitaorðabókini, finnur tú 146 uppskot um orð at seta ístaðin fyri mega/ógvuliga.

Hvussu bendast sodavatn og øl í fleirtali?

Vatn og øl eru hvørkikyn, men hvussu siga vit, tá vit bíleggja fleiri?
Tvær sodavatn ella sodavatnir og tvær øl ella ølir?

Fjarritari og hiti

Umframt hesi evni tosa vit eisini um, hvørt tað er rætt at siga fjarritari í Gekkinum, tá eitt fólk ringir inn til spælið og tosar fyri eitt annað.

Lurtari vil vera við, at tað er skeivt at brúka fjarritari.

Og so spyr lurtari, hví vit siga hitin, tá ið tað er kalt:

Í veðurtíðindunum hoyrist viðhvørt, - og aftur nú ein dagin: 'Hitin liggur um frostmarkið og 3 stig.'
Er tað ikki øvugt at tosa um hita, tá tað er so kalt sum um frostmarkið?
 

Mynd: Fyrsti Málteigurin í 2022 var sendur beinleiðis úr heiminum hjá Elini Henriksen á Strondum.
Myndatøka: Alexander Gaard