Í seinasta Málteiginum fyri jól umrøða vit júst tað, at siga fyri ella áðrenn jól og eftir ella aftan á jól.

- Tað er í lagi at siga áðrenn og aftan á jól, men um mann vil hava ordiliga flottan málburð, so sigur mann fyri og eftir, staðfestir Elin Henriksen.

Aðrar fyrisetingar, sum eisini verða brúktar saman við jólum eru: undan, til, nær, á, millum og undir.

Jól eru fleirtal, og tí eitur tað til jóla og ikki til jólar.

Rendi ella fór á land

Eg brúkti setningin: skipið rendi á land herfyri, og eg fekk viðmerking um, at tað hevði verið rættari at sagt fór ella rak á land. Men kann mann ikki siga rendi á land, spyr lurtari.

- Jú, tað kann mann saktans, men tað ræður um at gera sær greitt, hvat er hent. Tí at renna á land, fara á land og reka á land hava ikki somu merking.

Orðatøk og ársins orð

Vit umrøða eisini tvey orðatøk.
Annað er:

Ilt at læra gamlan hund uppi at sita.

og hitt er:

Eingin biskupur er ovlærdur og eingin skúladrongur ovbardur.

Ársins orð er lýsingarorð

Og so umrøða vit eisini ársins orð, sum er stuttfluttur. Hetta er eitt lýsingarorð, og tað bendist soleiðis:

Hetta er stuttfluttur matur
Vit gera stuttfluttan mat
Vit koma við stuttfluttum mati

Ella

Vøran er stuttflutt
Vit framleiða stuttflutta vøru
Og vit koma við stuttfluttari vøru

- Eg vóni, at hetta orðið verður varðveitt sum eitt lýsingarorð og brúkt samsvarandi, sigur Elin Henriksen, málkøn.