Klaksvíkingur bjóðar aftur av

Ormurin Langi hjá Knørri hevur verið einaráðandi hjá 10-mannaførunum tvey tey seinastu árini, men soleiðis skal ikki verða í ár. Tað siga teir á Klaksvíkingi, sum aftur er mannaður eftir tvey ár í neystinum.

 - Øll verða meir spent og glað, tá flaggskipið er mannað. Soleiðis er tað í einum og hvørjum felagi, sigur Hermann Samuelsen, sum er ein av teimum, sum manna Klaksvíking í ár.

Manningin er í stóran mun hin sama, sum vann føroyameistaraheitið við Nevinum Reyða í fjør.

 - Sjálvt um teir eru øgiliga ungir, so eru teir væl fyri og hugaðir at koma at rógva við 10-mannaførunum, og eg haldi eisini, at tað er har, ein skal koma heldur fyrr enn seinni, sigur Magnus Norðberg, sum er ein av royndu rógvarunum, sum aftur hevur tikið ár í hond.

Og Klaksvíkingur hevur greiðar ætlanir um at geva Orminum Langa kapping um meistaraheitið.

 - Hetta er ordiliga stuttligt. Hetta eru manningar, sum hava róð saman - nógvir av teimum - umborð á Klaksvíkingi, sigur Magnus Norðberg, sum kortini metir, at Ormurin Langi er favorittur. Hermann Samuelsen er avgjørdari.

 - Tað hevur ikki ordiliga verið nøkur kapping, men nú eru øll spent upp á, at Klaksvíkingur kemur við, og at kapping aftur verður hjá 10-mannaførunum, sigur hann. Og málið er greitt.

- Vit ætla okkum at vinna.

klaksvikingur_2_mynd.jpg