Pætur og Andrass í landsliðshitanum

Pætur Petersen úr HB og Andrass Johansen vóru feskir í landsliðshópinum hjá Håkani Ericson, sum varð tikin út í dag.

Andrass Johansen hevur støðugt talst millum bestu spælararnar hjá B36 í ár, og landsliðsvenjarin segði, at álopskendi spælarin hevur tikið seg fram í taktiska og verjukenda spælinum hetta kappingarárið.

 - Tað seinasta árið havi eg offrað meir fyri fótbóltin. Eri farin niður í arbeiðstíð og upp í fótbólti, og eg haldi, at tað hevur givið mær okkurt meir, sigur 20 ára gamli Andrass Johansen, sum hevur skotið sjey landskappingarmál í ár.

Hjá Pæturi Petersen er alt vent á høvdið. Fyri summarsteðgin spældi hann 1. deildarfótbólt, tí táverandi HB-venjarin ikki hevði álit á honum, men eftir at Dalibor Savic kom í venjarasessin, hevur skálvíkingurin verið flúgvandi.

 - Tað var ikki ein góð tíð, mann hugsaði nógvar tankar og mann ynskti seg næstan onkra aðra staðni enn HB. Venjarin bleiv so koyrdur, og eg havi fingið ordiligt álit frá Dalibor, og síðan tá hevur tað bara gingið øgiliga væl, sigur Pætur Petersen.

Dystirnir ímóti Litava og Turkalandi eru ávíkavist 22. og 25 september.