Jóan Símun sló til ímóti tomum turkum

Hann var aftur á landsliðsmáltalvuni fyri fyrstu ferð í fýra ár.

 - Hetta var ein fantastiskur sigur fyri okkum, tað er ikki nógv annað at siga, segði Jóan Símun Edmundsson.

Við frálíkum máli til 2-0 var hann ein av høvuðsmonnunum aftan fyri frálíka sigurin á Turkalandi á Tórsvølli sunnukvøldið.

 - Eg síggi, at Jákup fær bóltin, og eg veit hvussu gott vinstrabein, hann hevur, so eg skal bara renna, segði Jóan Símun Edmunsson.

Renningin aftur um verjuna var góð, og bólturin frá Jákupi Biskopstø Andreasen lá júst har, sum hann skuldi, og so kundi framherjin toyggja seg og senda bóltin í handara málhorn.

 - Eg tori ikki at jubla ov nógv, tí tú veitst ongantíð við VAR, um tú ert rangstaddur ella ikki, men eg raki bóltin perfekt og kann bara síggja hann fara inn, segði málskjúttin.