Hartaði sínar menn

Verjuavrikið í málleysa javnleikinum ímóti Lille á Tórsvølli var gott.

KÍ-venjarin, Magne Hoseth, lat kortini ongan iva vera um, at hann var ónøgdur við álopsspælið hjá sínum monnum.

 - Vit duga meir enn tað, sum vit vístu í kvøld. Vit tora ov illa, vit vísa teimum ov nógva virðing og vit eru ov óróligir, tá vit hava bóltin, segði Magne Hoseth.

 - Plássið er har, og vit mugu trúgva upp á, at vit eru góðir fótbóltsspælarar, tí tað eru vit. Vit hava dygdirnar, men vit gera okkum ikki dælt av teimum í dag, segði norski venjarin eftir søguliga javnleikin.

Lille hevði ilt við at hótta KÍ, og spældi seg í roynd og veru ikki til ein stóran málmøguleika í dystinum. Teir vóru nær við eftir steðgin, tá teir raktu tvørtræið, men veruleikin var, at Nils Jonathan Johansson onga bjarging var noyddur at gera.