Nú svimja tey í Kvívík

Hellufossur eitur nýstovnaða svimjifelagið í Kvívík.

 - Í staðin fyri at liggja og koyra til Havnar ella aðrastaðni, hugsaði eg: 'Nei! Vit hava ein svimjihyl, og vit hava møguleikarnar.' So vit fóru bara í gongd her í staðin, sigur forkvinnan í nýggja felagnum, Sára Midjord.

Í fyrsta umfari bjóðar felagið børnum úr 1. til 4. flokki til venjingar í 12,5 metra langa svimjihylinum í bygdini, og miðjað verður ímóti, at verða við til kapping seint í hesum kappingarárinum.

Bert tríggir venjarar eru í felagnum í løtuni, men lagt verður upp til møguligt samstarv við grannabygdirnar seinni.

 - Vit kappast ikki um fólkið við grannarnar hjá okkum. Flogbóltur og talv eru í Kollafirði, og hondbóltur er í Vestmanna, men tað er einki svimjifelagið nærri enn í Havn, so eg haldi, at vit passa væl inn, sigur næstformaðurin, Helgi Simonsen.