Albansk tjóðarveitsla bíðar landsliðnum

Håkan Ericson, landsliðsvenjari og Viljormur Davidsen, varaliðskipari, vænta eina sanna albanska tjóðarveitslu í morgin. 

Landsliðsvenjarin vónar og væntar, at landsliðið megnar at standa ímóti stóru atmosferuni, sum bíðar. Hann vil eisini, at føroyska liðið fer at skapa málmøguleikar móti Albania í annaðkvøld. Nakað, sum føroyingar hava havt tað trupult við í EM-undankappingini, har tað einans er blivið til tvey mál higartil.

Mikukvøldið vunnu albanar seg víðari úr bólkaspælinum og skulu til EM-endaspælið í Týsklandi næsta ár. Við sigri á Føroyum tryggjar Albania sær 1. plássið í bólkinum, Kekkia er tvey stig aftanfyri.