Hallur Danielsen: Við allan vegin

Hallur Danielsen hevur verið í umsitingini í Hondbóltssambandi Føroyar, síðan nýggja framgongdin byrjaði fyri umleið 10 árum síðani.

Nøkur stór mál vórðu sett, og Hallur Danielsen kann gleðast um, at fleiri mál verða rokkin fyri eygunum á honum á Mercedes Benz-Arena í Berlin í hesum EM-døgum.

- Deiligt at síggja, at hatta er okkara toppstig, tí so vita vit, at allar tær ætlanirnar, sum vit hava tosað um í nógv ár, framvegis eru realistiskar, sigur HSF-maðurin.

Hann viðgongur, at euforiin eftir ótrúliga javnleikin ímóti Norra leygarkvøldið framvegis ikki hevur lagt seg.

 - Tað ræður um at njóta løtuna uttan at koyra nøsina ov langt uppeftir, sigur Hallur Danielsen, og hann sipar helst bæði til dystin ímóti Póllandi, sum verður í annaðkvøld og í longri perspektivi.