Landsliðsvenjarin: Tað verður torført at fáa stig

Vónirnar um javnleik ella sigur í EM-undankappingardystinum ímóti Svøríki eru smáligar.

 - Vit fáa neyvan stig. Tær hava eitt av bestu liðunum í Evropa, sigur landsliðsvenjarin, Claus Mogensen.

Føroyar taptu við 17 málum í útidystinum ímóti svium í heyst, men munurin skal ikki vera eins stórur hesa ferð.

 - Eg vænti og vóni, at vit klára at minka um munin í mun til seinast, tá tað var ógvuliga trupult í seinna hálvleiki, so um vit klára at minka um málmunin, hevði tað verið ótrúliga gott, sigur Turið Arge Samuelsen.

 - Vit hava eisini bøtt um okkara spæl síðan ta ferðina, og megna betur at spæla ein heilan dyst á góðum stigi, sigur Claus Mogensen.

Ongin Maria og tað kemur illa við

Tað kemur illa við, at Maria Pálsdóttir Nólsoy breyt sær fingurin í venjing fyrr í vikuni. Bakspælarin úr Neistanum spælir vanliga ein lutfalsliga stóran leiklut í føroysku bakketuni.

 - Okkara álopsspæl viknar munandi, tí Maria er sterk ein ímóti einari, og dugir væl at meta um, hvussu spælast skal í hvørjum einstøkum føri, og vit fara at sakna hana, sigur Claus Mogensen.

Natasja Hammer er kallað inn í staðin fyri Mariu Pálsdóttir Nólsoy, og Føroyar fara at leggja seg eftir skjóta spælinum, sum millum annað Jana Mittún og Súna Krossteig Hansen standa fyri.

 - Men tað, sum eisini hevur stóran týdning, er at vit byggja ordiliga upp og fáa avsluttað okkara álop, tí sviar eru eitt av heimsins bestu kontraliðum, sigur landsliðsvenjarin.