Næsta ár verður Havnarbáturin við

Kappróðurin blómar í Havnar Róðrarfelag, sum við 13 manningum er best umboðaða felagið í kappróðrinum í ár. 

Í onkrum bátastøddum hevur felagið fleiri bátar við. Millum annað hjá áttamannaførunum, har Tórsbáturin og Ørvur kappast við Gøtu Trónd, Argjabátin og Heiðabátin.

Kortini hevur sigursvanda felagið úr Havn einki tíggjumannafar, men nú lovar formaðurin, at Havnarbáturin verður við næsta ár.

 - Ja, vit hava tvey áttamannafør í ár, og so veit eg væl, hvat næsti spurningurin hjá tær verður, sigur Bjarti Mohr.

 - Teir halda seg vera betur førar fyri tí næsta ár. Eitt unglingalið í fótbólti fer jú ikki beint upp á Betrideildini. Teir skulu upp ígjøgnum allar trappurnar, áðrenn teir koma upp á ovasta trin, greiðir formaðurin frá.

So Havnarbáturin verður við næsta ár?

 - Tað vænta vit, ja. Tað ætla vit í øllum førum. Tað hopa vit, sigur Bjarti Mohr.