Nervarnir kosta okkum dystin

EM-nervarnir kostaðu Føroyum dystin ímóti Sveis.

 - Tað tekur alt ov langa tíð, áðrenn tað fer av okkum, og tað ger, at vit tapa dystin í dag, segði Jana Mittún eftir 28-25 ósigurin í søguliga EM-dystinum hjá Føroyum.

Føroyar komu als ikki í gongd við álopsspælið fyri steðgin og gjørdu eitt ótal av tekniskum villum, sum høvdu við sær, at tær máttu til hálvleiks aftanfyri 13-7.

Trúgva upp á tað allan vegin

Eftir steðgin kom glið á. Føroyar nærkaðust alsamt vertunum, og eina lítla sera spennandi løtu, var bert eitt mál á muni. Tað eydnaðist kortini ikki at javna, og hóast Føroyar vunnu seinna hálvleik 18-15, máttu tær fara av vøllinum við trímálstapi.

 - Um tú hyggur at okkara innstillingi, so haldi eg, at vit trúgva upp á tað allan vegin. Sjálvt um vit eru aftanfyri við níggju einaferð, blíva vit við, og tað hava vit eisini brúk fyri í næstu dystunum, segði bakspælarin, sum var føroyskur toppskjútti við sjey málum.

Føroyar spæla aftur sunnudagin, tá Kroatia bíðar.