241 fólk latið lív í flogvanlukku

Fyrr í dag datt eitt flogfar niður stutt eftir fráferð úr býnum Ahmedabad í India.

242 ferðandi vóru umborð á flogfarinum, sum var á veg til Gatwick í London. 

Inntil seinnapartin í dag helt mann, at øll umborð doyðu. Nú er ein persónur funnin á lívi, sigur G.S. Malik, politiovasti í Ahmedabad.

Tilsamans eru meira enn 200 lík funnin á vanlukkustaðnum.

Tey deyðu eru bæði ferðafólk og fólk, sum vóru á økinum, har flogfarið datt niður.

Av teimum ferðandi vóru 169 indiskir ríkisborgarar, 53 bretar, sjey portugisar og ein kanadiari, upplýsir Air India.

Orsøkin til vanlukkuna er ikki greið. Sambært Flightradar24, sum heldur eygað við sivilu flogferðsluni, fór sambandi til flogfarið minni enn ein minutt eftir fráferð.

Flogfarið var av slagnum Boeing 787-8 Dreamliner.

Hetta er fyrstu ferð, at eitt Boeing 787-flogfar endar í eini  flogvanlukku av hesum slagnum. Vanlukkan verður søgd at vera álvarsamasta flogvanlukkan í eitt áratíggju.