Avroðið skal gagnnýtast

Vit skulu fáa meir burturúr avroðnum frá seyði, sum vanliga verður tveitt burtur. Ein nýggj bók er ávegis við uppskriftum og hugskotum, sum skal vísa, hvussu vit kunnu fáa meira burturúr avroðnum og skal vekja hugin at eta avroð. 

Tað er Kvinna, ið útgevur bókina og heitið er Tað sum eftir er.  Bókin verður útgivin 1. oktober. 

Ein stórur partur av tí, sum er etandi á seyðinum, endar í dag í burturkastinum. Fyrr var tað annars heilt vanligt at gagnnýta avroð og hava tað á føroysku døgurða- og nátturðaborðunum. Men við nýggjum matvanum og betri atgongd til útlendskan mat, er hendan siðvenjan so líðandi slept. 

Hetta vilja høvundarnir handan nýggju bókina broyta. Endamálið er bæði at geva íblástur til matgerð og samstundis at seta sjóneykuna á, hvussu vit kunnu fáa meira burturúr. 

Við bókini vóna høvundarnir at vekja hugin hjá føroyingum og fáa fólk at síggja avroðið sum eitt tilfeingi, heldur enn sum burturkast.