Vindmylluútbyggingarætlanin verður nógv seinkað

Vindmylluútbyggingarætlanin verður nógv seinkað
Vindmyllurnar í Klivaløkshaga á Sandoynni vera í minsta lagi eitt ár seinkaðar, kanska meira enn tað. Hetta er sera óheppið, sigur Haraldur S. Hammer, nevndarformaður í SEV
16.10.2025 - 19:24

Ein neyvari fuglakanning skal gerast av økinum við Klivaløkshaga í minst eitt ár.

Tað krevur Yvirfriðingarnevndin, áðrenn hon vil geva nakað loyvi til at at seta upp vindmyllur í Klivaløkshaga á Sandoynni.

 

Ingilín hevði fimm ára ætlan - heldur ikki

Útbyggingarætlanin hjá SEV gongur ikki sum ætlað. 

Á vári í fjør legði Ingilín D. Strøm, táverandi landsstýriskvinna í umhvørvismálum, fram vindmylluútbyggingarætlan næstu fimm árini. 

Í 2025 skuldu Klivaløkshavi á Sandoynni og ein útbygging av vindmyllulundini í Porkeri vera í rakstri, í 2027 Glyvrafjall, í 2029 Junkarhagi og í 2030 skuldi Vestfelli vera í rakstri. 

Men hetta fer ikki at halda.

Útbyggingin í Porkeri er ikki ein gong boðin út, og Klivaløkshagi verður seinkaður í minsta lagi eitt ár, helst meira, nú Yvifriðingararnevndin krevur at fuglalívið skal kannast í minst eitt ár. 

Harumframt skuldi ein vindmyllulund gerast á Eiði í 2022, men hon er fullkomuliga steðgað upp.

At útbyggingarnar av vindmyllum steðgar upp, hóvar ikki nevndarformanninum í SEV, nú SEV hevur gjørt stórar íløgur bæði á Sandi og aðrastaðni at taka móti orkuni frá vindmyllunum.

- Vit hava gjørt stórar íløgur í batarískipan og koblingsstøð á Sandi og aðrastaðni í landinum, og at ætlanin verður seinkað, er sera óheppið, sigur Haraldur S. Hammer.

 

Yvirfriðingarnevndin stendur við sítt

Fyri at fáa verkætlanin at rigga, hevur Jóhan í Niðristovu, sum vann útboðið, flutt myllurnar longur norð, burtur frá Gróthúsvatni og longur upp í hædd, so at tað ikki skuldi órógvað fuglalívið eins nógv.

Men Yvirfriðingarnevndin setir framvegis krav um, at avleiðingin av fuglalívinum skal kannast nærri.

Elveitingareftirlitið, sum samskiftir við Yvirfriðingarnevndina um málið, hevur í skrivi 3. oktober heitt á Yvirfriðingarnenvdina um at fáa ein fund í lag so at til ber at tosa við Yvirfriðingarnevndina og tosa seg fram til eina loysn.

Enn hevur Elveitingareftirlitið ikki hoyrt aftur frá Yvirfriðingarnevndini. 

Ætlanin er ikki at bjóða út naka nýggja vindmylluætlan fyrr enn greið viðurskifti eru komin við Yvirfriðingarnevndina um ein loyst í framtíðini, sigur Ari Johanneson, leiðari í Elveitingareftirlitinum.

 
Er kopiera
Nýggjastu sendingar í ÚV
Hósdag 12. november
Breddin: Kervi+ og fólkaskúlin
216300
Hósdag 12. november
Eitt fræ
216034
Hósdag 12. november
Hús
216070
Mikudag 11. november
Dansival 11 nov 2026
216272
Mikudag 11. november
Vágskálin: Millum veruleika og óveruleika
215895
Nýggjastu sendingar í SV
Sunnudag 15. november
Eitt dýpi av dýrari tíð 2:2
216214
Leygardag 14. november
Eitt dýpi av dýrari tíð (1:2)
216213
Hósdag 12. november
Talvið um Tinganes (2:2)
216265
Týsdag 10. november
Veðrið
216210