Fólk rúsa seg við sproytu

Á herberginum vísir leiðarin, Martin Kúrberg, á tríggjar spannir.

Í hvørjari spann eru sproytunálur, sum fólk hava brúkt síðani fyri vikuskiftið - umleið fjøruti til samans.

- Hetta byrjaði av álvara umleið eitt ella hálvtannað ár síðani, sigur Martin Kúrberg, ið er ørkymlaður um hesa gongdina av rúsevnisnýtslu, sum vit ikki hava sæð áður í Føroyum.

Eisini á Landssjúkrahúsinum hava tey varnast gongdina:

- Tað er serliga í ár og í fjør, at vit hava fingið sjúklingar inn, ið hava infektiónir í sambandi við at hava sproytað seg við rúsevni, sigur Shahin Gaini, professari í smittusjúkum.

Hann leggur afturat, at tað kann hava álvarsligar avleiðingar at sproyta seg - millum annað er vandi fyri at fáa blóðeitran og Hepatitis C.

Ymisk rúsevni

- Tað er ymiskt, hvørji rúsevni fólk brúka at rúsa seg við, men tað er alt tað, tey fáa fatur á, sigur Martin Kúrberg.

Shahin Gaini vísir á, at tað sum oftast er heilivágur, ið er útflýggjaður til onkran eftir ávísing, og síðani knústur og sproytaður í æðrarnar hjá teimum, ið misnýta tað sum rúsevni.

Hesum greiða teir nærri frá í innslagi í Degi og viku.