Partarnir hava lagt sjónarmiðini fram

Kommunala Arbeiðsgevarafelagið, KAF, og Heilsuhjálparafelagið, sum hittust á fundi hjá Semingsmanninum klokkan tíggju fyrrapartin, hava lagt sjónarmið síni fram fyri hvørjum øðrum, og fóru klokkan hálvgum tólv í lítlan steðg.

- Arbeitt hevur verið konstruktivt við tí tilfari, sum partarnir høvdu at leggja fram í morgun, segði Terje Sigurðsson, semingsmaður, í stuttari viðmerking fyri løtu síðani.

Terje Sigurðsson sigur, at partarnir hava brúkt tíðina síðani fyrradagin til at fyrireika seg til fundin í dag.

Fundurin verður tikin uppaftur klokkan eitt, og Terje Sigurðsson roknar við, at tey verða sitandi til út á kvøldið.

Semingsmaðurin sigur seg hava góðar vónir um at fáa semju partanna millum.

Mary Antonsdóttir

Greinað tøl

Mary Antonsdóttir, forkvinna í Heilsuhjálparafelagnum, segði í stuttari viðmerking í morgun, áðrenn hon fór á fund, at hon síðani fyrradagin hevði greinað nøkur tøl, og tí hevði okkurt nýtt við á fund í dag.

Meira fekst hon ikki at siga, men vísti til semingsmannin.

Mikudagin í næstsíðstu viku vrakaðu bæði Heilsuhjálparafelagið og KAF eitt semingsuppskot um ein eitt árs sáttmála - heilsuhjálpararnir millum annað tí tað gav ov lítið, og kommunalu arbeiðsgevararnir millum annað, tí tað var ov dýrt.

Terje Sigurðsson

Gamli sátmálin gekk út 1. oktober í fjør, og partarnir hava samráðst í fleiri umførum. M.a. varð ein semingsroynd gjørd fyri tveimum vikum síðan, sum endaði við, at báðir partar vrakaðu semingsuppskotið.

Tá segði Mary Antonsdóttir, forkvinna í Heilsuhjálparafelagnum, at semingsuppskotið gav teimum ov lítið. Per Martin Gregersen, formaður í KAF segði hinvegin, at semingsuppskotið var ov dýrt fyri tey.