Framsókn svarar mánadagin

Fimm dagar, tað var alt, sum løgmaður gav flokkunum at hugsa seg um, hvørja av teimum fýra leiðunum, sum eru nevndar í avgerðarritinum um Suðuroyartunlin, flokkarnir velja. 

Flokkarnir hava svarað í dag, men tann eini flokkurin, Framsókn, hevur fingið freistina útsetta til mánadagin.

Framsókn hevur annars verið sera atfinningarsamur móti Suðuroyartunlinum. Millum annað Karlot Hergeirsson, sum hevur spurt, hvar pengarnir skulu koma frá. 

Liljan Weihe, tingfólk hjá Tjóðveldi, er eisini rættiliga atfinningarsom. Hon sigur millum annað, at lurtast má eftir Búskaparráðnum og Landsbankanum.

Úr Djúpadali til Sandvíkar

Bæði Miðflokkurin og Sambandsflokkurin hava sagt, at teir taka undir við leið 1 A, sum er ein tunnil úr Djúpadali norðanfyri Skarvanes til Sandvíkar í Suðuroy.

Hetta er sama farleið, sum Tunnilsfelagið og løgmaður allatíðina hava mælt til; nú verður bara Skúgvoy knýtt uppí.

Hinir flokkarnir hava ikki sagt alment, hvørja leið teir viðmæla.

Kristian Stórhamar, sum er ein av høvuðspersónunum fyri eini alternativari farleið frá vestanfyri Sandsvatn til Sandvíkar, er eisini sera atfinningarsamur.

Eisini fyrrverandi politikarin, Heðin Zachariassen, er sera atfinningarsamur móti tí, sum løgmaður hevur lagt fyri flokkarnar.

Hann vísir á, at har eru alt ov nógv ógreið viðurskifti í avgerðarritinum.

Uppskotið um at hækka pensjónsaldurin kemur

Ruth Vang hevur fleiri ferðir sagt, at Suðuroyartunnilin verður ikki samtyktur, uttan at pensjónsaldurin eisini fer upp.

Eirikur í Jákupsstovu, sum umsitir pensjónirnar, sigur, at arbeitt verður við málinum, og hann væntar, at innan 14 dagar verður uppskot lagt fram bæði um at hækka pensjónsaldurin og eitt slag av tíðartreytaðari pensjón.