Kenslurnar fingu frítt at fara á Dungasandi

Kenslurnar fingu frítt at fara á Dungasandi í dag, tá tað var greitt, at 07Vestur, við tí uttasta av neglunum, hevði megnað at hildið fast í plássinum í bestu deildini. 

"Hetta hevur alt at siga fyri felagið," fekk Ari í Haraldsstovu Petersen, 07Vestur-liðskiparin, stama fram úr sær eftir dystarlok, áðrenn eyguni blivu blonk, og tárini trýstu á. 

Tað var veruliga við tí uttasta av neglunum, sum Ari í Haraldsstovu Petersen fekk á bóltin, tá eitt EB/Streyma-skot úr seks metrum sá út til at vera á veg í málið, tá bert fáir minuttir av dystinum restaðu.

Ari í Haraldsstovu Petersen, 07Vestur

Ari í Haraldsstovu Petersen, málverji og liðskipari hjá 07Vestri, var avgerandi fyri sítt lið í dag (Mynd: JN.fo)

Fór bólturin í málið, so stóð 4-3 til EB/Streym á máltalvuni, og so hevði 07Vestur, sum í minsta lagi skuldi hava eitt stig burturúr dystinum, neyvan komið afturíaftur. 

Bjargingin, ið uttan iva er ársins besta og týdningarmiklasta, minti um nakrar av teimum størstu í søguni. Gordon Banks fyri Ongland móti Brasilia og Pele í HM 1970, Peter Schmeichel fyri Danmark móti Týsklandi og Klinsmann í EM-finaluni í 1992 og so framvegis. Og ja, bjargingin var veruliga so góð. 

Javnleikurin 3-3 á Dungasandi, samantvinnnað við ta sannroynd, at B36 vann 2-0 móti FC Suðuroy í Gundadali, var akkurát nógv mikið hjá 07Vestri at bjarga sær enn eitt ár í bestu fótbóltsdeildini. 

07Vestur, Casper Gedsted Hansen

Dagsins leikari hjá 07Vestri, Casper Gedsted Hansen, hevur lagt lið sítt framum 3-2 (JN.fo)

07Vestur - EB/Streymur 3-3 (1-2)
Á Dungasandi

0:1 Kristian Svabo Eliasen (18.)
1:1 Jonathan Timothy Flensborg (26.)
1:2 Búi Egilsson (39.)
2:2 Nicolai Møller Dohn (54.)
3:2 Casper Gedsted Hansen (63.)
3:3 Mórits Heini Mortensen (77.)

SÍ FLEIRI MYNDIR FRÁ DYSTINUM HER