Klæðir dálka illa

Jú meira vit keypa, jú meira dálka vit eisini.

Og hetta er vorðið ein stórur umhvørvistrupulleiki.

Tað sigur Ragnheiður Bogadóttir, lektari í samfelagsvísindum. 

500 tons innflutt í fjør

Áleið 500 tons av klæðum blivu innflutt til landið í fjør.

Ímeðan hesi klæði vera flutt inn, lata hjálparfelagsskapir hvørt ár 150 tons til endurvinning í Týsklandi.

Hóast nógv klæði hvørt ár fara til endurvinning, er tað, sambært Ragnheiði Bogadóttir, kortini ein stórur partur, sum als ikki kann endurvinnast, og sum endar sum rusk í triðjalondum.

Ringt at niðurbróta mikroplast

Tað er mikroplast, sum er ein stórur syndari, sambært Ragnheiði Bogadóttir. 

Mikroplast verður nógv brúkt í klædnaframleiðslu í dag, og er serliga skaðiligt fyri umhvørvið, tí tað sambært, Ragnheiði Bogadóttir, er so ringt at niðurbróta.

Tað er als ikki gott fyri umhvørvið, men heldur ikki kroppurin hevur gott av klæðum við mikroplasti í, sigur Ragnheiður Bogadóttir. 

Krevjandi at broyta gongdini

Um gongdin skal vendast og ovurnýtslan tálmast, noyðast fleiri liðir at verða virknir í leikinum.

Hugburðurin hjá fólki noyðist at broytast, men eisini á samfelagsstigi, má okkurt gerast.

Størsti batin hendur tó ikki fyrr enn ein altjóða semja kemur í lag, sum kann tálma mikroplasti í klæðum, sigur Ragnheiður Bogadóttir.