FM á langgeil: Føroyingarnir í Aalborg væl nøgdir

Isak Brisenfeldt og Líggjas Joensen vóru væl nøgdir við úrtøkuna til føroyameistarakappingina á langgeil, sum var í Havn um vikuskiftið. 

Líggjas Joensen vann gull í 200, 400, 800 og 1500 metur frísvimjing og 200 metur rygg, meðan Isak Brisenfeldt fór avstað við gullinum í 50, 100 og 200 metur firvald og í 100 metur frí.

Teir umboðaðu HS og Ægir til FM-kappingina, men svimja annars við Aalborg Svømmeklub, har Líggjas Joensen hevur verið í tvey ár og Isak Brisenfeldt er komin afturat fyri einum hálvum ári síðan.

 - Tað er virkuliga deiligt. Øll eru fitt har, og eg trívist sera væl. Líggjas er eisini har, so tað er ikki bara danskt, smílist Isak Brisenfeldt.

 - Liðini eru stór, og tað er góð uppmøting. Tú fært kapping til hvørja venjing, og tað eru altíð nógvir venjarar á kantinum at hjálpa einum, leggur Líggjas Joensen afturat.

Í august skal Isak Brisenfeldt svimja til EM. Tað skal Líggjas Joensen eisini, men fyrst fyri er evropeiska ungdómsmeistarakappingin, og har eru málini hjá Líggjasi Joensen stór.

 - Eg fari at satsa upp á finalupláss í Em fyri juniorar. Fari at royna at svimja upp ímóti juniormetunum hjá Páli (Joensen, blaðm.). So fáa vit at síggja, hvussu tað gongur.