Umhvørvisstovan kannar dálking í Stórá

Umhvørvisstovan kannar nú málið um boridust, sum rann út í Stórá í Saksunardali.

Fyri tveimum vikum síðani greiddi Kringvarpið frá, at vatnið í ánni hevði verið dálkað við boridusti. Boridustið kom frá einum plássi, har restir frá jarðhitaboringum verða lagdar.

Tá visti Umhvørvisstovan ikki av málinum, men nú verður hendingin kannað nærri.

Búnaðarstovan hevur eisini verið á staðnum í Saksunardali og tosað við festaran. Sambært festaranum verður boridustið ikki tyrvt sum burturkast, men goymt sum taðingartilfar til at bøta um jørðina.

Búnaðarstovan metir, at hetta kann vera ein skilagóð loysn. Men hóast tilfarið kann brúkast til jarðarbetran, eigur tað ikki at enda í áum, vøtnum ella aðrari náttúru.

Sambært Umhvørvisstovuni eru reglurnar greiðar. Tilfarið skal handfarast soleiðis, at tað ikki rennur út í áir, vøtn ella aðra náttúru.

Sunda kommuna hevur ikki givið nakað undantak í hesum føri. Kommunan sigur, at restir frá jarðhitaboringum skulu burturbeinast, antin til Kommunalu brennistøðina ella til IRF, og ikki leggjast á eitt festi í kommununi. 

Borgarstjórin í Sunda kommunu, Eyðstein Zachariasen, sigur við Kringvarpið í dag, at kommunan nú bíðar eftir niðurstøðuni frá Umhvørvisstovuni, áðrenn støða verður tikin til, um fleiri stig skulu takast í málinum.