Thorning tekur seg úr leiðandi starvi

Fyrrverandi danski forsætisráðharrin, Helle Thorning Schmidt, vísir aftur, at hon hevur snýtt í skatti.

Men hon tekur seg aftur úr einum leiðandi starvi í einari nevnd, sum hon hevur fingið í ST. Henda nevndin skal arbeiða ímóti skattasviki

Hon sigur seg stúra fyri, at tíðindini um, at hon hevur havt samskifti við feløg í skattaskjóli, fara at fylla meira enn arbeiðið í nevndini, sigur hon í einum telduposti til Ttðindastovuna Ritzau.

- Eg havi valt at taka meg aftur. Arbeiðið í serligu nevndini hjá ST hevur stóran týdning, og eg vil ikki, at arbeiðið verður darvað av nøkrum, sigur hon í boðunum til tíðindastovuna.

Ekstra Blaðið skrivaði um málið

Tað var Ekstra Blaðið, sum skrivaði, at Helle Thorning Schmidt, eigur part í einum felagi á oynni Jersey, sum er kend sum skattaskjól.

Harumframt er hon í tveimum nevndum hjá feløgum, sum beinleiðis hava tilknýti til skattaskjól.

- Bæði feløgini rinda skatt, har tey hoyra heima. Safelane Global Holdings rindar skatt í Bretlandi, og Carsøe rindar skatt í Danmark. Nevndarlimirnir rinda eisini skatt, har tey búgva, sigur hon í boðunum til Ritzau.

Herfyri fekk Helle Thorning Schmidt eitt týðandi starv í ST, har hon skuldi vera partur av eisini serligari nevnd, sum skuldi virka fyri at steðga sviki í skatti og steðga skattaskjólum. Hon vísir tíðindunum í Ekstra Blaðnum aftur, men velur samstundis at fara burtur úr nevndararbeiðinum í ST.

Vildi ikki gera viðmerkingar

Ekstra Blaðið sigur seg í fleiri vikur hava roynt at fáa viðmerkingar frá Helle Thorning Schmidt, men tað hevur ikki eydnast.

Helle Thorning Schmidt skuldi vera annar av tveimum formonnum í serligu nevndini hjá ST.

 Hin er fyrrverandi forsætisráðharrin í Niger, Ibrahim Mayaki, skrivar Ritzau.