Økið í Saksun verður boðið alment til sølu

Ætlaða økið í Saksun, sum er selt til sethúsaøki til summarhús, skal kortini bjóðast alment til sølu.

Ta avgerðina tók fíggjarnevndin í Sunda kommunu á fundi í gjárkvøldið.Men økið verður ikki lýst alment til sølu, fyrr enn endaliga niðurstøðan hjá Yvirfriðingarnevndini er komin.

Málið kemur fyri á býráðsfundi í Sunda kommunu 24. februar.

Seldu til p.f. Svartá

Kommunan gjørdi annars av at selja pf. Svartá undir stovnan økið fyri minni enn 220.000 kr., uttan at bjóða økið út. Økið skuldi nýtast til at byggja summarhús á.

Men kommunan hevði ikki heimild at selja felagnum økið undirhonds, segði Hilmar Høhenni, leiðari í Kommunala eftirlitinum.

Heðin Zachariassen, borgarstjóri í Sunda kommunu, viðgekk samstundis, at tað var eitt mistak, at lendið ikki varð boðið út í almennari sølu.

Og nú er so avgerð tikin um, at økið í Saksum verður boðið út í almennari sølu, og tað skal kommunan taka støðu til 24. februar.

Málið eisini kært

Málið um ætlaðu summarhúsbyggingina í Saksun er eisini kært.

Jóhan Jógvansson, bóndi í Saksun, hevur kært avgerðina til Umhvørvisstovuna og Yvirfriðingarnevndina.

Bygdarfólkið í Saksun hevur eisini mótmælt ætlanini.