Tey skulu ikki gjalda - hóast alt

Nú er greitt, at Niels Rødgaard og Rósa Heinesen sleppa undan at gjalda góðar 26.000 krónur, tí hon átti í Føroyum

Niels Rødgaard og Rósa Heinesen sleppa nú undan sjálvi at gjalda, tí hon átti í Føroyum

Mynd: Privatmynd

06.03.2020 - 07:40

Kunngerðin, sum sleppur pápum, sum eru í útbúgving uttanlands, undan at gjalda, tá konan ella unnustan eigur í Føroyum, er nú lýst, og hon virkar frá 1. august í fjør.

Rósa Heinesen átti á Landssjúkrahúsinum í oktober í fjør. Sambært reglum frá 2009 kann kvinna, sum er í útbúgving uttanlands, føða í Føroyum ókeypis.

>> SÍ EISINI Kæra avgerð um rokning frá Landssjúkrahúsinum

Men vildi ein pápi, sum er í útbúgving uttanlands, at barn hansara skuldi føðast í Føroyum, varð kravt gjald fyri ta tænastuna, um mamman ikki eisini var lesandi. Hendan støðan kom undan kavi í oktober í fjør.

Niels Rødgaard og Rósa Heinesen, sum búgva í Danmark, har hann er í útbúgving, men ikki hon, fingu at vita, at tey skuldu gjalda fyri at eiga sonin Rana í Føroyum.

Tey vóru í skundi komin til Føroya fyri at vera saman við mammu Niels, sum hevði krabbamein og lá til tað síðsta. Men nú er kunngerðin broytt, og broytingin kom í gildi 1. august í fjør.