Ongin fótbóltur í apríl

Allur fótbóltur í apríl mánaði er avlýstur. 

Tað boðar Fótbóltssambandið frá á heimasíðu sínari. 

Kappingarnevndin hevur gjørt av, at fyribils verða allar kappingar, sum FSF skipar fyri í apríl mánaði, útsettar. 

Tað merkir, at ongir dystir í lands- og steypakapppingunum verða spældir fyri 1. mai, og tað er galdandi fyri bæði vaksnamanna- og barnafótbólt, sigur FSF. 

Avgerðin er tikin í samráði við heilsumyndugleikarnar, og ikki fyrr enn nýtt tilmæli frá myndugleikunum kemur, koma boð frá FSF, um nær kappingarnar kunnu byrja, og hvør kappingarætlanin síðani verður.