Asfaltverkið strikað í partafelagsskránni

Partafelagið Asfaltverkið varð í vikuni strikað í partafelagsskránni.

Felagið fór í sjálvbodna likvidatíon í mai í fjør. Og likvidatiónin er nú endað.

P/f Asfaltverkið var nógv í fjølmiðlunum í fjør, tí fyrst leigaði Landsverk asfaltverkið á Sundi frá felagnum, og síðani keypti Landsverk verkið.  

Samskiftið við Landsverk setti stóran dám á roknskapin hjá Asfaltverkinum.

Ein mánað eftir, at Landsverk keypti asfaltverkið á Sundi, fór felagið í sjálvbodna likvidatión.

Stórt avlop

Frá 2005 og fram til fyrstu leiguavtaluna við Landsverk í 2016, hevði felagið millum 1,7 og 4,8 milliónir krónur í yvirskoti. 

Í 2016, tá avtalan varð gjørd við Landsverk, var úrslitið 11,7 milliónir krónur, og átta milliónir vórðu goldnar í vinningsbýti. 

Í 2017 og 2018 var yvirskotið beint omanfyri tríggjar milliónir krónur, sum fyrst og fremst komu frá leiguni til Landsverk.