Avlopið tódnar 70 mió. kr. í ár

Covid-19 fer at ávirka úrslitið hjá BankNordik í ár, men bankin væntar kortini at hava avlop í 2020.

Fyrsti ársfjórðingur gav 30 milliónir krónur í halli fyri skatt, men BankNordik væntar kortini framgongd í grundrakstrinum, og í løtuni verður mett, at avlopið í ár verður millum 30 og 80 milliónir kr..

Tað eru 70 milliónir minni enn upprunaliga mett.

Gongdin á virðisbrævamarknaðinum hevði við sær hall í virðisbrøvunum hjá BankNordik fyrsta ársfjórðing, tryggingarinntøkurnar minkaðu, og harumframt vórðu 25 milliónir krónur settar av ímóti tapi, sum kunnu væntast í kjalarvørrinum av koronakreppuni.

Í útvarpstíðindunum klokkan 17 verður samrøða við Árna Ellefsen, forstjóra í BankNordik, um úrslitið hjá bankanum.