115 milliónir útgoldnar eftir hjálparpakka eitt

Arbeiðsloysisskipanin rindaði 8.400 fólkum umleið 115 milliónir krónur í lønarískoyti eftir hjálparpakka 1.

ALS bar kostnaðin av hjálparpakkanum til 30. juni. Skipanin heldur fram til 31. august og landið rindar pengarnar fyri teir báðar seinnu mánaðirnar.

ALS hevði metár í fjør, og avlopið var 200 milliónir krónur, sum er tað besta úrslitið síðani skipanin varð stovnað í 1992.

Inngjøldini settu met í 2019

Samlaðu inngjøldini settu aftur met í fjør. Tey vóru samanlagt 245,2 milliónir krónur. Samlaðu útgjøldini vóru 20 milliónir krónur lægri enn árið fyri.

Tey vóru 51,2 milliónir krónur, sum er tað lægsta, útgjøldini hava verið síðani 2008. Ársúrslitið í 2019 var eitt avlop uppá 199,7 milliónir krónur, sum er 68,4 milliónir krónur meiri enn í 2018.

Við árslok var eginognin 911 milliónir krónur krónur, sum er tað mesta í søguni hjá ALS.