- Tíðindi, mentan og ítróttur
Løgreglan keddi seg ikki ólavsøkuaftan

Við jøvnum millumbili var boð eftir løgregluni á nátt. Løgreglufólk tóku sær av fleiri fullum og avdotnum fólkum í býnum. Eisini var onkur farin til hendurs, men tað var loyst á friðarligan hátt. Samarittarnir hava hjálpt nógv til, og tað hevur lætt um uppgávurnar hjá løgregluni.
Ein fullur maður er skuldsettur fyri brot á politiviðtøkurnar, tí hann ikki vildi siga navn sítt í samband við spurningar frá løgregluni.
Illgruni var eisini um, at ein bilførari koyrdi ávirkaður, antin av alkoholi, medisini ella rúsevnum. Persónurin varð handtikin, og løgreglan bíðar nú eftir svari frá blóðroyndini.
Løgreglan hevur somuleiðis verið nógv til staðar í býarlívunum í nátt fyri at forða fyri ov stórum mannamúgvum. Tað var tó ikki so nógv, ið løgreglan kundi gera, annað enn at minna fólk á tilmælini um frástøðu. Tað kann vera avbjóðandi at halda tilmælini undir vanligum umstøðum, verri verður tá fólk hava fingið alkohol niðurum, sigur løgreglan.
Nakað av fólki var eisini á ólavsøku í Suðuroy. Politið vitjaði á fleiri skeinkistøðum, men har var gott skil, sigur Tina Jakobsen, vaktleiðari á politistøðini í Havn.


























