Eingin heittvatnshylur í nýggja bygninginum

Eingin heittvatnshylur verður í nýggja H-bygninginum á Landssjúkrahúsinum.

Tað váttar Kaj Leo Holm Johannesen, landsstýrismaður í heilsumálum, í svari upp á fyrispurning frá Heðini Mortensen, løgtingsmanni.

Hetta verður ikki broytt, sigur Kaj Leo Holm Johannesen. 

Nýggi H-bygningurin er komin væl áleiðis, og avgjørt er, hvat fermetrarnir skulu brúkast til. Tað er hvørki fígging ella pláss fyri heittvatnshyli í H-bygninginum, stendur millum annað í svarinum frá landsstýrismanninum.

Verandi heittvatnshylur á Landssjúkrahúsinum var tikin í nýtslu aftur í 2018, eftir at hann var umvældur.

Hylurin er lítil

Í svarinum hjá Kaj Leo Holm Johannesen framgongur, at heittvatnshylurin á Landssjúkrahúsinum er lítil. 

Tá talan er um at veita einstøkum sjúklingum serviðgerð, er tað fyrimunur, at hylurin hevur ta stødd, sum hann hevur, men hann er ov lítil hjá bólkum at brúka.

Í løtuni er eingin ítøkilig ætlan at broyta umstøðurnar, staðfestir landsstýrismaðurin.

Á Suðuroyar sjúkrahúsi er ein góður heittvatnshylur, ið verður nógv brúktur. 

Endurvenjingartilboð

Endurvenjingin til giktasjúklingar verður eisini styrkt við nýggja endurvenjingartilboðnum í Sjúkrahúsverkinum.

Klaksvíkar sjúkrahús verður m.a. nýtt til hetta endamál. Har er góður og stórur heittvatnshylur til endamálið, stendur millum annað í svarinum frá landsstýrismanninum í heilsumálum til Heðin Mortensen.