Beinta spyr Jenis um tilfar til orðblind

Beinta Løwe, løgtingskvinna, spyr nú Jenis av Rana, landsstýrismann í mentamálum, hví nóg nógv tilfar ikki er á føroyskum, m.a. í náttúrulærugreinum, til fólk, sum hava lesitrupulleikar.

Í Breddanum í útvarpinum í gjár kom fram, at tilfar á føroyskum í m.a. náttúrulærugreinum, t.d. støddfrøði og alis- og evnafrøði, er ov avmarkað ella ikki tøkt, og at lærarar og næmingar mugu leita eftir fløgum og fløguspælarum fyri at kunna fylgja við.

Føroyskt tilfar til orðblind er ikki teldutøkt og harvið verður ikki fylgt við tøkniligu menningini.

Beinta Løwe spyr eisini landsstýrismannin í mentamálum, nær væntast kann, at tilfar til orðblind og fólk við lesitrupulleikum er teldutøkt, so tað verður lætt at finna fram og brúka í undirvísingini.