Eirikur nýggjur formaður

Eirikur í Jákupsstovu er nýggjur formaður í Miðlastuðulsnevndini undir Mentamálaráðnum.

Jenis av Rana, landsstýrismaður, hevur sett nevndina av nýggjum, eftir at trý ára skeiðið hjá fyrstu Miðlastuðulsnevndini er runnið.

Høvuðsuppgávan hjá nevndini er at býta út tann stuðul, sum verður settur av á fíggjarlógini til privatar tíðindamiðlar. Á fíggjarlógini fyri 2020 í ár eru settar tvær milliónir krónur av til henda stuðul, og sama upphædd er sett av í fíggjarlógaruppskotinum fyri 2021.

Leisturin broytast

Landsstýrismaðurin í mentamálum hevur boðað frá, at leisturin, ið verður brúktur til at býta út stuðulin, skal broytast. Og tað verður so ein uppgáva hjá Miðlastuðulsnevndini at vera við til tað arbeiðið.

Búskapar- og Løgfrøðingafelagið, Føroysk Miðlafólk og Fróðskaparsetrið velja hvør sín lim og varalim í nevndina. Sambært miðlastuðulslógini skal umboðið fyri Búskapar- og Løgfrøðingafelagið vera formaður í nevndini.

Í Miðlastuðulsnevndini, sum er vald fyri næstu trý árini, sita nú Eirikur í Jákupsstovu fyri BLF, Beate L. Samuelsen fyri Føroysk Miðlafólk og Rógvi Olavson, valdur av Fróðskaparsetrinum.