Valsendingin verður teknmálstulkað

Tá Kringvarpið sendir um kommunuvalið í annaðkvøld, verður sendingin teknmálstulkað.

Tað sigur Jenis av Rana, landsstýrismaður, sum hevur svarað Beintu Løwe, løgtingskvinnu, ið spurdi um teknmálstulkar.

Spurt varð, hví sendingar í Kringvarpinum, sum vanliga verða tulkaðar beinleiðis, ikki verða tulkaðar í løtuni.

Teknmálstulkatænastan, tænastan hjá Almannaverkinum, sum tulkar sendingarnar fyri Kringvarpið, hevur bara ein tulk í løtuni, sigur Jenis av Rana.

Hann sigur, at Teknmálstulkatænastan verður betur mannað fyrst í komandi ári, tá ein tulkur kemur aftur úr barnsburðarfarloyvi.