Hækka prísirnar undan Black Friday

Handlarnir brynja seg til Black Friday, sum verður fríggjadagin, og líkt er til, at nøkur av góðu tilboðunum eru ikki so góð,  sum tey tykjast vera.

í Danmark í øllum førum hava fleiri handlar seinastu mánaðirnar hækkað prísirnar á vørunum, í eini roynd at geva eina mynd av, at tilboðið er betri enn tað í veruleikanum er, tá prísirnir aftur verða lækkaðir útsøludagin, sum er fríggjadagin.

Pricerunner hevur greinað prísirnar á 1.000 útvaldum vørum hjá 50 av størstu nethandlum í Danmark, og har vísa tølini, at 70 prosent av handlunum hava sett prísirnar upp síðani 11. september, tá greiningin byrjaði.

Dýrka tvey prosent

Í miðal eru vørurnar dýrkaðar tvey prosent, vísir greiningin hjá Pricerunner, sum er ein tænasta, ið samanber prísir hjá handlum í Danmark.

Stjórin fyri Pricerunner í Danmark, Martin Andersen, sigur við danska TV2, at slík tilboð eru følsk, men tey eru ikki ólóglig, tí einki er í vegin fyri, at handlar hækka prísin nakrar mánaðir fyri eina útsølu, so leingi hetta verður gjørt í góðari tíð.

Sambært danskari lóg, skal ein vøra hava havt sama prís í minsta lagi seks vikur, áðrenn nýggja tilboðið verður lýst, fyri at kunna siga, at fyrri prísurin er vanligur prísur.

Eisini føroyska brúkaraumboðið hevur ásett, at vanligi prísurin skal hava verið galdandi í minsta lagi seks vikur, áðrenn hann kann verða nýttur sum samanbering við ein nýggjan tilboðsprís.