Koronukanningarnar hava kostað 29 mió. kr.

Higartil hevur tað kostað landinum og sjúkrahúsverkinum knappar 29 milliónir krónur at lata privatar fyritøkur taka sær av koronukanningum og greiningum.

Tað stendur í svari, sum Kaj Leo Holm Johannesen, landsstýrismaður, hevur givið Beintu Löwe, løgtingskvinnu.

Løgtingskvinnan spurdi millum annað, hvussu nógv landið og sjúkrahúsverkið hava rindað fyri kanningarnar.

Sáttmáli er við fyritøkurnar Thetis og Smyril Line um kanningar við landamørkini og um vanligar kanningar.

Væl nøgdur

Kaj Leo Holm Johannesen, landsstýrismaður í heilsumálum, sigur verða væl nøgdan við samstarvið higartil, eisini við prísin, sum er 390 krónur fyri hvørja kanning.

Kanningararbeiðið var ikki boðið út í hesum umfari, men Kaj Leo Holm Johannesen útilokar ikki, at verður tað neyðugt seinni, verða aðrir møguleikar eisini kannaðir.

Fyribils verður hildið fram við kanningunum til 31. mars. 

Meiri verður at frætta í útvarpstíðindunum.