Bjargarar at leita eftir teimum burturblivnu

Nú skulu bjargingarfólk og hundaførarar leita eftir teimum burturblivnu í Gjerdrum, norðanfyri Oslo, har ein stór skriða leyp mikudagin, skrivar VG.

10 fólk eru framvegis ikki komin afturíaftur.

Higartil hevur verið leitað við dronu, tí tað hevur verið ov vandamikið at senda fólk inn í sjálvt økið at leita. 

 - Tað hevur ikki eydnast okkum at senda bjargingarfólk inn enn, men vit vóna, at tað fer at eydnast okkum í dag, sigur átaksleiðarin, Ketil Lund, við VG.

DR skrivar at talan er um svenskar bjargingarserfrøðingar, sum skulu inn í sokallaða reyða økið, har jørðin framvegis flytir seg  at leita eftir fólki inni í húsunum.

 - Vit fara inn í niðara partin av økinum at leita í húsum, har tað ber til. Kanningararbeiðið kann vera vandamikið, men vit eru væl fyrireikað, sigur átaksleiðarin hjá løgregluni, Roy Alkvist, sambært DR. 

Skriðan er umleið 300 metrar breið og umleið 700 metrar long. Níggju bygningar, har 31 húski hava búð, eru farin í skriðulopinum. Seks bilhús eru eisini farin í skriðulopinum. Skriðan ger enn um seg og vandi er fyri, at fleiri hús kunnu fara í skriðuni, skrivar VG.