- Tíðindi, mentan og ítróttur
Løgreglan við áheitan
Klokkan 22:30 leygarkvøldið fekk løgreglan fráboðan um, at trý ljós frá lummalyktum fluttu seg í fjøllunum tætt við Oyndarfjørð.
Løgreglan sendi tí fólk at finna fram til, um alt var sum tað skuldi, og tað vísir seg, at tað vóru fólk, sum vóru farin í hagan at taka myndir av vakra mánalýsinum.
Tað hendir meira enn so, at løgreglan setir størri kanningararbeiði í verk, tí stúrt verður fyri, at folk eru komin í neyð í fjøllunum, men at tað síðani vísir seg, at fólkini bara eru farin ein túr.
Tí sigur vakthavandi á løgreglustøðini í morgun, at tey vilja heita á fólk, sum ætla sær í hagan í myrkri, um at boða løgregluni frá, so tá fráboðanir koma inn, so hevur løgreglan samband við tey, sum eru farin í hagan, og sleppur undan at seta størri kanningararbeiði í gongd.